Bu il Bakıda Ombudsmanların Simpoziumu keçiriləcək

Bu il Bakıda Milli İnsan Hüquqları Günü münasibətilə iyunun 18-də Ombudsmanların Simpoziumu keçiriləcək.

Bu barədə "Report"a müsahibəsində Azərbaycanın İnsan Hüquqları üzrə Müvəkkili (Ombudsman) Səbinə Əliyeva deyib.

O bildirib ki, 2025-ci il Azərbaycanda “Konstitusiya və Suverenlik İli” elan edilib və bu çərçivədə bir sıra tədbirlərin təşkili planlaşdırılır:

"18 İyun – Milli İnsan Hüquqları Günü münasibətilə Bakıda Ombudsmanların Simpoziumunu keçirməyi və bu tədbirə beynəlxalq tərəfdaşlarımızı, müxtəlif ölkələrin ombudsmanlarını və milli insan hüquqları institutlarının rəhbərlərini dəvət etməyi planlaşdırırıq. Simpoziumda aidiyyəti dövlət qurumları, vətəndaş cəmiyyəti institutları, eləcə də yerli və xarici media nümayəndələrinin iştirakı gözlənilir".

Ombudsmanın sözlərinə görə, simpoziumda qanunun aliliyi və yaxşı idarəetmənin gücləndirilməsi kimi vacib məsələlər müzakirə ediləcək.