Heydər Əliyevin Meksikadakı heykəlinin götürülməsi məsələsinə YAP-dan açıqlama

"Amerika Azərbaycanlıları Demokratiya Uğrunda" Cəmiyyətinin (AZAD) sədri Elmar Şahtaxtinski Mexiko şəhər hökumətinə müraciət edərək, Heydər Əliyevin heykəlinin götürülməsinə çağırıb. Heydər Əliyevin heykəlinin götürülməsinə dair komissiyanın qərarı ilə əlaqədar Meksikada yaşayan Azərbaycan və türk icmaları abidənin yerləşdiyi parkda etiraz aksiyası keçiriblər. Aksiya Latın Amerikası Azərbaycanlıları Assosiasiyası tərəfindən, qurumun sədri, professor Natiq Atakişiyevin təşkilatçılığı ilə keçirilib.

Məsələyə münasibət bildirən hakim Yeni Azərbaycan Partiyasının (YAP) icra katibinin müavini, millət vəkili Siyavuş Novruzov AzNews.az-a açıqlamasında deyib: "Güman edirəm ki, bu heykəl götürülməyəcək. Bilirsiz ki, Meksika Xocalı soyqırımını tanıyan ölkələrdən biridir. Ona görə də erməni lobbisi bütün gücünü Meksika-Azərbaycan münasibətlərinin korlanmasına sərf edir. Ermənilər buna nə qədər çalışsalar belə, onların istəkləri baş tutmayacaq".

Qeyd edək ki, Təhlil Komissiyası şəhər hökumətinə Heydər Əliyevin heykəlinin götürülməsi barədə tövsiyə verib. Abidə parkın təmiri üçün pul ödəyən Azərbaycan səfirliyi tərəfindən ucaldılıb. İmzalanmış sazişə görə, abidə 99 il yerində qalmalıdır. Tövsiyə açıqlandıqdan sonra Azərbaycanın Meksikadakı səfiri İlqar Muxtarov bəyan edib ki, heykəl götürülsə, Azərbaycan Meksikada 4 milyard dollar həcmində investisiya layihələrini reallaşdırmaqdan imtina edəcək.

Vasif Həsənli
AzNews.az