Deputatlar Aydın Məmmədov və Dilarə Əliyeva həlak olub – 24 il öncə

Tarixdə bu gün: 20 aprel

Tarixdə bu gün aprelin 20-də Ali Sovetin deputatları, tanınmış alimlər Aydın Məmmədov və Dilarə Əliyeva seçicilərlə görüşdən qayıdarkən Qax rayonu ərazisində avtomobil qəzasında həlak olublar. Hər iki deputat parlamentdə "Demokratik Azərbaycan" blokunun aktiv üzvləri idilər.



1827 - İranla müharibə (1826-1828) gedişində Azərbaycanın cənubuna doğru irəliləyən rus qoşunları Araz çayı üzərindəki Xudəfərin körpüsünü (Cəbrayıl rayonu ərazisində) tutublar. Strateji əhəmiyyətli körpünün ələ keçirilməsi rus qoşunlarının cənubdan Naxçıvan xanlığına hücumlarına imkan yaratdı. May ayında Naxçıvan işğal olundu.

1885 - Tanınmış pediatr, Azərbaycan səhiyyə sistemində mühüm xidmətləri olmuş professor Əbülfəz Qarayev (1885-1952) anadan olub.

1894 - Xalq artisti, aktyor və rejissor Rza Abbasqulu oğlu Təhmasib (1894-1980) anadan olub. "Bakıda küləklər əsir", "Qanun naminə" və s. filmlərdə çəkilib, "Səbuhi", "Arşın mal alan" (1945), "Onu bağışlamaq olarmı?" filmlərinə quruluş verib.

1906 - Əməkdar incəsənət xadimi, ilk azərbaycanlı musiqişünas qadın Xurşid Həsən bəy qızı Ağayeva (1906 - 3.12.1953) anadan olub. Dövlət Konservatoriyasında musiqi tarixindən dərs deyib.

1907 - Xalq şairi Məmməd Rahim (1907-6.5.1977) anadan olub. "Leninqrad göylərində", "Abşeron torpağında", "Natəvan" poemalarının, "Xaqani" mənzum dramının müəllifidir. Rus dilindən ədəbi tərcümələr edib.

1916 - Xalq artisti, milli teatr sənətimizin görkəmli nümayəndəsi Nəsibə Cahangir qızı Zeynalova (1916-10.3.2004) anadan olub. 1938-ci ildən Musiqili Komediya Teatrında çalışıb, Züleyxa ("Ulduz"), Kəblə Fatma ("Hacı Kərimin Aya səyahəti", Cəhri xala ("Altı qızın biri Pəri"), Qızbacı ("Hicran") kimi rolları ilə yadda qalıb. "Ögey ana" (Fatmanisə), "Böyük dayaq" (Telli), "Ulduz" (Züleyxa), "Qanun naminə (Şəhla xanım), "Qaynana" (Cənnət xala), "Yuxu" (Məsmə) və s. filmlərdə maraqlı obrazlar qalereyası yaradıb.

1920 - Yazıçı-dramaturq Xanımana Sabir qızı Əlibəyli (1920 – 7.5.2007) Bakıda doğulub. Uşaqlar üçün 30-dək kitabın, o cümlədən "Ulduzların qucağında", "Bir yay səhəri", "Çoxbilmiş çəpişlər", "Məni günəşə at!", "Meşə həkimi" poemaları, "Gözəllər gözəli", "Aycan", "Dovşanın ad günü", "Cunquş", "Durnalar lələk salır", "Meyvələrin şahı" və s. dram əsərlərinin müəllifidir.

1926 - Tanınmış tarzən Əlikram Həsən oğlu Hüseynov (1926- 2006) anadan olub.

1927 - Məşhur rus aktyoru Pavel Borisoviç Luspekayev (1927-1970) anadan olub. Ayaqları amputasiya olunmuş halda "Səhranın bəyaz günəşi" filmində (Pavel Vereşşaqin) çəkilib.

1929 - Yazıçı, filologiya elmləri doktoru, professor Çingiz Hüseyn oğlu Hüseynov anadan olub. "Fətəli fəthi", "Məhəmməd, Məmməd, Məmiş", "Ailə gizlinləri", "Doktor N", "Tamaşalı oyunlar" və s. romanların müəllifidir. Moskvada yaşayır, Moskva Dövlət Universitetinin filologiya fakültəsində dərs deyir.

1944 - Azərbaycan xanəndəlik sənətinin görkəmli nümayəndəsi Cabbar Qaryağdıoğlu (31.3.1861 - 1944) vəfat edib.

1949 - Tanınmış Amerika kinoaktrisası Cessika Lenq (Jessica Lange) anadan olib. İki dəfə "Oskar"a ("Tutsi", "Mavi səma") layiq görülüb.

1991 - Ali Sovetin deputatları, tanınmış alimlər Aydın Məmmədov və Dilarə Əliyeva seçicilərlə görüşdən qayıdarkən Qax rayonu ərazisində avtomobil qəzasında həlak olublar. Hər iki deputat parlamentdə "Demokratik Azərbaycan" blokunun aktiv üzvləri idilər.

1992 - Azərbaycanla Estoniya arasında diplomatik əlaqələr yaradılıb.

1997 - Prezident Heydər Əliyev "Kitabi Dədə Qorqud"un 1300 illiyinin geniş şəkildə qeyd olunması haqqında fərman imzalayıb. "Kitabi Dədə Qorqud"un yubileyi 2000-ci ilin aprelində UNESCO səviyyəsində qeyd olunub.

2004 - Azərbaycanla Paraqvay arasında diplomatik münasibətlər qurulub.