Messinin komandası PSJ-nin qonağı olacaq

Bu gün futbol üzrə Çempionlar Liqasında 1/4 final mərhələsinin daha 2 oyunu keçiriləcək.

AzNews.az xəbər verir ki, Avropanın iki nəhəng klubu olan Almaniya "Bavariya"sı ilə İspaniya "Barselona"sı rəqibləri Portuqaliyada "Portu" və Fransada PSJ ilə qarşılaşacaq.

Bu mövsüm heç bir matçda məğlubiyyətlə üzləşməyən "Portu" xüsusən də evdə çox yaxşı çıxışı ilə yadda qalıb. Ardıcıl 9 qələbə və cəmi 2 top buraxmaqları diqqətləri bu kluba çəkib. Amma komandanın 2 ən yaxşı bombardiri - Kristian Telyo Errera və 6 qol vurmuş Cekson Arley Martines Valensiya "Bavariya" ilə matçı buraxacaqlar. Xosep Qvardiolanın baş məşqçi olduğu Almaniya klubu isə artıq ölkə çempionluğunu böyük ölçüdə təmin edib. Bununla belə, münhenlilər matça ciddi itkilərlə çıxacaqlar. Yarımmüdafiəçi Frank Riberi və Bastian Şvaynştayger ilk matçı buraxacaqlar. Hər iki futbolçu zədələrini sağalda bilməyib. David Alaba və Mehdi Benatiyanın da matçda iştirakı sual altında qalır.
Qvardiolanın keçmiş komandası "Barselona" Fransa paytaxtına xal itkisi ilə yollanıb. Kataloniya təmsilçisi İspaniya çempionatında "Sevilya" ilə görüşdən 2:2 hesablı heç-heçə ilə ayrılıb. Bununla belə, klub La Liqanın lideri kimi mövqeyini qoruyur. Hazırda "Barsa"nın heyətində cəmi bir itki var. Müdafiəçi Daniel Alves sarı vərəqə limitini aşdığı üçün matçı buraxacaq.

Fransa çempionatının lideri PSJ də hazırda yaxşı formadadır. Amma komandanın lideri Zlatan İbrahimoviç cəzalı olduğundan, "Barselona" ilə görüşü buraxmalı olacaq. Müdafiəçi Serj Oryo, yarımmüdafiəçi Marko Verratti də eyni səbəbdən oynamayacaq. Amma PSJ İbrahimoviç itkisindən təəssüflənməyə də bilər. Çünki isveçli hücumçu bu mövsüm Çempionlar Liqasında cəmi 2 qol vurub. Komandanın bombardiri isə vaxtilə Azərbaycan Premyer Liqasında "İnter" və "Neftçi"nin formasını geyinmiş Valter Quqlemonun qardaşı Edinson Kavanidir. Uruqvaylı forvardın aktivində 2 qol var.

Çempionlar Liqası
1/4 final, ilk oyunlar
23:45. "Portu" (Portuqaliya) - "Bavariya" (Almaniya)
Baş hakim: Karlos Velasko Karbalyo (İspaniya)

23:45. PSJ (Fransa) - "Barselona" (İspaniya)
Baş hakim: Mark Klatenburq (İngiltərə)