Zaxarovadan İran rəsmilərinin Zəngəzur dəhlizi ilə bağlı Rusiyaya etirazlarına MÜNASİBƏT

Rusiya Xarici İşlər Nazirliyinin rəsmi nümayəndəsi Mariya Zaxarova Rusiya səfirinin Zəngəzur dəhlizi ilə bağlı İran XİN-ə çağırılmasına da toxunub.

Aznews.az xəbər verir ki, o, bugünkü brifinqdə bildirib ki, bu məsələ əslində başqa cür olub.

“İranlı deputatlarının bəyanatlarını görmüşəm, hansı ki, həmin bəyanatlarda onlar Rusiyanın Zəngəzur dəhlizi ilə bağlı mövqeyini tənqid ediblər. İran tərəfinin reaksiyası ilə bağlı nə deyə bilərəm? Biz tərəfdaşlarımızla daimi təmasdayıq. Biz bu mövzu ilə bağlı bütün aydınlaşdırmaları təqdim etmişik. Hesab edirik ki, bizim tərəfimizdən gətirilən arqumentlər Tehranda eşidilib və qəbul edilib”, - Rusiya XİN rəsmisi qeyd edib.

O, məlum mövzu ilə əlaqədar İranda anti-Rusiya informasiya kampaniyasının müəyyən dairələr tərəfindən aparıldığını, həmin dairələrin Moskva ilə Tehran arasında genişlənən strateji tərəfdaşlıq münasibətlərinə maneə olmaq üçün hər fürsətdən istifadə etdiyini vurğulayıb. Zaxarova bunları təxribat adlandırıb və bunda Qərbin əlinin olduğunu bəyan edib: “Ona görə ki, vəziyyətin bu cür inkişafından, bu cür informasiya kampaniyasından ancaq qərblilər udur”.