"Ermənistanda revanşistlər sülhə qarşı çıxmaq üçün hər cür vasitədən istifadə edəcəklər" -Siyasi şərhçi

“İlk növbədə qeyd etmək lazımdır ki, Azərbaycan Silahlı Qüvvələri Ermənistan ərazisində deyil, Azərbaycanın öz ərazisindədir və Azərbaycanın işğaldan azad etdiyi torpaqlarda strateji mövqelərini möhkəmləndirib və heç bir halda geri çəkilməyəcək. Yəni, bu, danışıqlar prosesində müzakirə mövzusu ola bilməz. Azərbaycanın prinsipial mövqeyi bundan ibarətdir. Digər tərəfdən, təbii ki, sülh sazişinin irəliləməsi və ya pozitiv meyllərin müşahidə olunması daşnakların, eyni zamanda onların fikir ataları olan kilsə və lobbinin maraqlarına qətiyyən uyğun gəlmir. Çünki bunlar illər boyu uydurduqları yalana özləri də inanaraq və bu istiqamətdə planlar quraraq, Azərbaycan torpaqlarının 30 il ərzində işğalda saxlanılmasına nail oldular. “Böyük Ermənistan” ideologiyası məhz kilsə və lobbinin dəstəyi ilə Ermənistanın dövlət siyasətinə çevrildi”.

Bu fikirləri Aznews.az-a açıqlamasında Ədalət, Hüquq, Demokratiya (ƏHD) Partiyasının İdarə Heyətinin üzvü, siyasi şərhçi Əli Zülfüqaroğlu deyib.

Xatırladaq ki, Erməni İnqilabi Federasiyası - Daşnaksutyun Partiyası Paşinyan hakimiyyətinin Azərbaycanla imzalamaq istədiyi sülh sazişinə qarşı çıxıb. Partiya bəyanatında qeyd edir ki, Azərbaycanla müzakirə edilən sazişdə Ermənistan-Azərbaycan sərhədinin dəqiqləşdirilməsi və Azərbaycan silahlı qüvvələrinin “Ermənistan ərazilərindən” çıxarılması məsələsi əhatə olunmur. Bundan əlavə, daşnaklar sülh sazişinin “Artsax” məsələsi ilə bağlı ermənilərin gözləntilərinə cavab vermədiyini bildirirlər. Keçmiş prezidentlər Robert Köçəryan və Serj Sarkisyanın rəhbərlik etdiyi Hayastan Bloku və Respublikaçılar Partiyası da bu mövqeyə dəstək verərək, Paşinyanın imzalayacağı sazişin Ermənistanın maraqlarına zidd olduğunu vurğulayıblar.

Siyasi şərhçi bildirib ki, erməni lobbisinin Birləşmiş Ştatlarda, xüsusilə Amerika Erməniləri Milli Komitəsi (ANCA) tərəfindən həyata keçirdiyi fəaliyyət nəticəsində irəvanın bir sıra beynəlxalq dəstək əldə etdiyi məlumdur.

“Amerika Erməniləri Milli Komitəsi erməni lobbisinin ən güclü təşkilatıdır və bu təşkilat həmçinin dünyanın müxtəlif ölkələrində də fəaliyyət göstərən erməni lobbi təşkilatları üçün tezis mərkəzi rolunu oynayır. Azərbaycanla Ermənistan arasında sülh sazişinin imzalanması üçün, Ermənistan əvvəlcə Azərbaycanın şərtlərinə əməl etməlidir. Bu şərtlərdən biri də Ermənistan Konstitusiyasında Azərbaycana qarşı olan ərazi iddialarının aradan qaldırılmasıdır. Bu, Ermənistan siyasətini indiyə qədər formalaşdıran kilsə və lobbiyə verilmiş müstəsna hüquqlarının tamamilə aradan qaldırılması deməkdir. Yəni, erməni kilsəsi və lobbisi Ermənistan dövlətçiliyində və siyasi hakimiyyətin formalaşmasında mühüm rolu olan güclər olaraq bu hüquqdan məhrum ediləcək. Təbii ki, kilsə və lobbi bununla heç bir zaman barışmayacaq. Bu isə onu deməyə əsas verir ki, əllərində kifayət qədər maliyyə gücü və beynəlxalq əlaqələrə sahib olan erməni lobbisi, həmçinin kilsə və onlara bağlı olan törəmə təşkilatlar, eyni zamanda bu ideologiya ətrafında birləşən revanşist qüvvələr, Koçaryan və Sərkisyan kimi siyasətçilər sülhə mane olmaq üçün bütün mümkün vasitələrdən istifadə edəcəklər. Təbii ki, daxildə Ermənistan hökumətinə qarşı təzyiqlər formalaşması qaçılmazdır. Amma Ermənistan cəmiyyətində revanşistlərlə bağlı fikirlər birmənalı deyil”.

Siyasi şərhçi əlavə edib ki, Vətən müharibəsindən sonra keçirilən seçkilərdə kapitulyasiyaya imza atan Paşinyanın yenidən qələbə qazanması, erməni cəmiyyətində revanşistlərə qarşı münasibətin birmənalı olmamasını təsdiq edir: “Bu isə onu deməyə əsas verir ki, revanşistlər və onların dəstəkçiləri olan kilsə və lobbinin Paşinyana qarşı apardıqları anti-təbliğat cəhdlərinin uğur qazanması çox çətindir. Ermənistan cəmiyyətindəki bu fikir ayrılığı və parçalanma revanşistlərin və onların dəstəkçilərinin Paşinyana qalib gəlməsi çətin görünür. Həmçinin, Azərbaycanın geosiyasi mövqeyinin güclənməsi və zamanın Azərbaycanın xeyrinə işləməsi də proseslərə təsir edəcək. Azərbaycanın hərbi və diplomatik mövqeləri güclənir. Ona görə də, revanşistlərin sülh sazişinə qarşı çıxması Ermənistan dövlətçiliyi üçün yalnız fəlakət vəd edir”.

Rəfiqə NAMAZƏLİYEVA,

AzNews.az