"Rusiya israr etsədə, Ukraynada seçki məsələsi gündəmdə deyil" -AÇIQLAMA

“Ötən ay Ukrayna və Amerika Birləşmiş Ştatlarının nümayəndə heyətləri arasında keçirilən görüşdə Ukrayna atəşkəslə bağlı ABŞ-nin təklifini qəbul etdiyini bildirmişdi. Ukrayna prezidenti bəyan etmişdi ki, ölkəsi ABŞ-nin 30 günlük atəşkəs təklifini qəbul edir. Eyni zamanda, Qara dənizdə naviqasiyanın təhlükəsizliyinin təmin edilməsi, enerji obyektlərinə zərbələrin dayandırılması və digər məsələlərlə bağlı müəyyən razılaşmalar əldə olunub. Lakin Rusiya hələ ki, ABŞ-nin təklifinə müsbət cavab vermir və görünən odur ki, danışıqlarda əlavə tələblər irəli sürür. Bu səbəbdən də Ukrayna ilə Rusiya arasında atəşkəsə dair yekun razılaşma əldə edilməyib”.

Bu fikirləri AzNews.az-a açıqlamasında siyasi şərhçi Mətin Məmmədli deyib.

Qeyd edək ki, Ukraynada siyasi vəziyyət mürəkkəb olaraq qalır. Prezident Volodimir Zelenskinin vəzifə müddəti 2024-cü ilin may ayında başa çatsa da, müharibə və hərbi vəziyyət səbəbindən seçkilər təxirə salınıb. Ukrayna parlamenti Zelenskini qanuni prezident kimi tanımağa davam edir və bildirir ki, seçkilər yalnız atəşkəs əldə olunduqdan və hərbi vəziyyət ləğv edildikdən sonra keçiriləcək. ABŞ bir müddətdir Ukrayna və Rusiya arasında atəşkəsin əldə olunması istiqamətində səylər göstərsə də, hələlik 1 aylıq atəşkəs barədə razılıq əldə edilməyib. Sabiq müşavir Aleksey Arestoviç yanvarın 25-də atəşkəsin mümkün olduğunu qeyd etsə də, bu baş verməyib. Son günlər isə aprelin 20-dək atəşkəsin əldə olunacağı ilə bağlı iddialar səsləndirilir.

Siyasi şərhçi qeyd edib ki, müharibə davam edəcəyi təqdirdə Ukraynada seçkilərin keçiriləcəyini düşünmür.

“Çünki Ukrayna hakimiyyətinin, xüsusilə də Zelenskinin mövqeyi belə bir şəraitdə seçkilərin keçirilməsini mümkünsüz hesab edir. Baxmayaraq ki, həm ABŞ, həm də Rusiya bu məsələdə fərqli mövqelər sərgiləyir. Xüsusilə, Rusiya tələb edir ki, Ukrayna hakimiyyəti yeni seçkilər keçirsin. Eyni zamanda, Moskva Zelenskinin legitimliyini sual altına alır. Bu məsələ tərəflər arasında ciddi fikir ayrılığına səbəb olub. Ancaq mümkündür ki, atəşkəs razılaşması əldə olunduqdan sonra Ukraynada seçkilər keçirilsin. Müharibənin son durumu ilə bağlı qeyd etmək olar ki, hazırda hərbi əməliyyatlarda heç bir tərəf ciddi üstünlük qazana bilməyib. Baxmayaraq ki, Rusiya son aylarda taktiki üstünlük əldə edib, strateji üstünlük – yəni düşməni tamamilə sıradan çıxarmaq – müşahidə olunmur. Hazırda Rusiya cəbhədə müəyyən taktiki üstünlüyə malikdir və bəzi əraziləri ələ keçirib. Bununla yanaşı, Ukrayna da əsas müqavimət potensialını qoruyub saxlayır”.

Rəfiqə NAMAZƏLİYEVA,

AzNews.az