Həyatını Vətəninə həsr etmiş fədai - jurnalist Zibeydə Şakir

28 noyabr 2020-ci il tarixində Azərbaycanın Füzuli rayonunun işğaldan azad edilmiş Aşağı Seyidəhmədli kəndi ərazisində dəhşətli bir faciə baş verdi.

QHT.az xəbər verir ki, “Qayıdış” qəzetinin baş redaktoru, peşəkar jurnalist və vətənpərvər ana Zibeydə Şakir qızı Adilzadə, ailə üzvləri ilə birlikdə tank əleyhinə minaya düşərək şəhid oldu. Bu hadisə yalnız onun yaxınları üçün deyil, bütün Azərbaycan xalqı üçün dərin bir itki idi. Zibeydə xanımın həyat və fəaliyyəti həm jurnalistikanın, həm də vətənə sevginin ən gözəl nümunəsidir.

Həyat yolu və fəaliyyəti

1982-ci ildə Füzuli rayonunun Üşbulaq kəndində ziyalı bir ailədə dünyaya gələn Zibeydə Adilzadə hələ gənc yaşlarından öz yüksək intellekti, ictimai fəallığı və qətiyyəti ilə fərqlənirdi. Ali təhsilini tamamladıqdan sonra jurnalistika sahəsində çalışaraq, peşəkarlığı və vətənpərvər mövqeyi ilə tanındı. O, əvvəlcə “Araz” qəzetinin baş redaktoru, daha sonra isə “Qayıdış” qəzetinin baş redaktoru kimi fəaliyyət göstərirdi.

44 günlük Vətən müharibəsi zamanı Zibeydə xanım Azərbaycan Ordusunun qələbəsini işıqlandırmaq üçün işğaldan azad olunan ərazilərə səfər edən ilk qadın jurnalistlərdən biri oldu. Onun vətənə bağlılığı, "Füzuli şəhərinə gedən ilk qadın mən olacam!" kimi sözlərində əks olunurdu.

Faciəvi ölüm və şəhadət

Zibeydə Adilzadə vətən sevgisini yalnız sözlərdə deyil, əməllərində də göstərdi. İşğaldan azad olunmuş torpaqlarda böyük həvəslə çalışdığı bir vaxtda, ailə üzvləri ilə birlikdə tank əleyhinə mina partlayışında həyatını itirdi. Onun şəhadəti yalnız bir jurnalist kimi deyil, bir ana, bir övlad və bir vətəndaş kimi də böyük bir itki idi.

Vətənə sevgisi və irsi

Zibeydə xanımın paylaşdığı sözlər onun vətənə olan məhəbbətinin ən gözəl ifadəsidir:

“Ana, Vətən kəlməsini bir daha dərindən dərk etdim. Gəzməyə də, ölməyə də Vətən yaxşı!”

Onun qələmə aldığı məqalələr, sosial şəbəkə paylaşımları və fəaliyyəti bu sevginin əyani sübutudur. O, “Böyük qayıdış” məqaləsini tamamlamaq üçün gedib, lakin bu məqaləni tamamlamaq ona qismət olmadı.

Gənc nəsil üçün ilham mənbəyi

Zibeydə xanımın həyat hekayəsi yalnız keçmişdə qalan bir xatirə deyil. O, gələcək nəsillər üçün vətənpərvərlik, peşəkarlıq və insanlıq nümunəsi olaraq yaşayır. Onun şəhidliyi bizə işğaldan azad olunan torpaqlarda həyat qurarkən diqqətli olmağın vacibliyini bir daha xatırladır.

Bu gün şəhid jurnalistimizin doğmalarına, dostlarına və həmkarlarına dərin hüznlə başsağlığı veririk. Onun xatirəsi hər zaman qəlbimizdə yaşayacaq. Allah rəhmət eləsin! Məkanın cənnət olsun, Zibeydə xanım!

Pərvanə Fərhadqızı

QHT.az