Azərbaycanda siyasi dialoqun yeni mərhələsi

Azərbaycanda siyasi dialoqun yeni mərhələsi: İqtidar və Partiyalar arasında konstruktiv əməkdaşlıq
Fevralın 25-də Prezident Administrasiyasının təşkilatçılığı ilə “Hilton Baku” hotelində keçirilən dəyirmi masa ölkədə siyasi dialoq mühitinin təşviqi və siyasi partiyalarla dövlət orqanları arasında əməkdaşlığın gücləndirilməsi baxımından mühüm bir hadisə kimi qiymətləndirilə bilər. Tədbirdə dövlət qurumlarının nümayəndələri, müxtəlif siyasi partiyaların rəhbərləri, media və akademik çevrələrin təmsilçiləri iştirak edərək, ölkədə siyasi sistemin inkişafına dair müzakirələr aparıblar.

Bu toplantı siyasi dialoqun dərinləşdirilməsi və inklüziv siyasi sistemin formalaşdırılması baxımından mühüm əhəmiyyət kəsb edir. Son illərdə Azərbaycanda həyata keçirilən islahatlar, o cümlədən 2022-ci ildə qəbul edilən “Siyasi partiyalar haqqında” Qanun, partiyaların institusional güclənməsinə və siyasi səhnədə balanslı iştirakına şərait yaradır. Bu qanun ölkədə fəaliyyət göstərən bütün siyasi partiyalar üçün eyni hüquq və imkanlar təmin etməklə, onların fəaliyyətini daha şəffaf və hesabatlı etməyə yönəlib.

Dəyirmi masa çərçivəsində çıxış edən Prezident Administrasiyasının rəsmisi Ədalət Vəliyev siyasi partiyaların cəmiyyətdə rolunun artırılmasının vacibliyini vurğulayıb. Xüsusilə, 2024-2025-ci illərdə baş tutan seçkilərdə siyasi partiyaların geniş iştirakı demokratik proseslərin dərinləşməsinin göstəricisi kimi qiymətləndirilib.. Burada əsas məqamlardan biri də dövlətin siyasi partiyalara maliyyə yardımı mexanizmləri və onların hesabatlılığı məsələsinin müzakirəsi olub. Bu, gələcəkdə partiyaların dayanıqlı inkişafına və onların siyasi sistemdə daha aktiv iştirakına töhfə verə bilər.

Müzakirələrdə iştirak edən partiya liderləri və təmsilçiləri də milli maraqların qorunması, ölkənin siyasi stabilliyi və demokratik inkişafı üçün açıq dialoqun davam etdirilməsinin vacibliyini vurğulanıb. Qeyd edilib ki, siyasi partiyaların bir-biri ilə və dövlət qurumları ilə konstruktiv əməkdaşlığı yalnız siyasi sistemin dayanıqlığını artırmaqla qalmır, həm də cəmiyyətin müxtəlif sosial və iqtisadi problemlərinin həllinə yönəlib.
Maraqlı məqamlardan biri də müzakirələrin konkret problemlər və onların həll yolları ətrafında aparılması olub. Xüsusilə, partiyaların seçki proseslərində fəallığının artırılması, seçki sistemində şəffaflığın və bərabər imkanların təmin olunması, siyasi rəqabət mühitinin gücləndirilməsi kimi məsələlər ön plana çıxdı. Bu, göstərir ki, hökumət və siyasi partiyalar arasında dialoq artıq formal xarakter daşımır, əksinə, praktik məsələlərin həllinə yönələn bir müzakirə platformasına çevrilməkdədir.

Son nəticə olaraq, bu görüş Azərbaycanda siyasi sistemin daha inklüziv və açıq olması istiqamətində atılan addımların davamı kimi dəyərləndirilə bilər. Əgər bu cür müzakirələr mütəmadi davam edərsə, o zaman siyasi proseslərdə daha geniş iştirakçılığın təmin olunması, siyasi plüralizmin inkişafı və demokratik institutların möhkəmlənməsi istiqamətində əhəmiyyətli nəticələr əldə etmək mümkündür. Bu baxımdan, dəyirmi masanın gələcəkdə də davamlı şəkildə təşkili və konkret nəticəyönümlü dialoqların aparılması ölkənin siyasi inkişafına mühüm töhfə verə bilər.

İsmayıl Nadirxanlı