Ukrayna-Rusiya müharibəsi dünyanın gündəmindədir.
Ukrayna prezidenti Volodimir Zelenskinin ABŞ-də üzləşdiyi rəftarın əks-sədaları davam edir.
Ağ Evdə prezident Donald Trampla kameralar qarşısında mübahisə edən Zelenski Avropaya gedib.
İngiltərənin paytaxtı Londonda Ukrayna ilə bağlı sammit keçirilib.
Türkiyə də daxil olmaqla bir çox Avropa ölkəsi müxtəlif səviyyələrdə sammitə qatıldığı halda, Yunanıstan bu sammitə qatılmayıb.
Yunanıstanda sammitdə iştirakın olmaması da gündəmdədir...
Yunanıstanın dünən Londonda keçirilən Ukrayna sammitində iştirak etməməsi ölkənin müxalifət partiyaları tərəfindən “uğursuzluq” kimi tənqid edilib.
Ana müxalifət partiyası Panhellenik Sosialist Hərəkatı (PASOK), Radikal Sol Alyans (SYRIZA) və Yeni Sol hökumətin xarici siyasətini qeyri-adekvat və səmərəsiz olmaqda ittiham edib.
PASOK-un Xarici Siyasət Sözçüsü Dimitris Mancos və Avropa İşləri katibi Nikola Papazoğlunun birgə bəyanatında Yunanıstanın Avropanın təhlükəsizlik arxitekturasına dair mühüm müzakirələrə qatılmamasının “narahatedici” olduğu bildirilib.
Açıqlamada Yunanıstanın beynəlxalq arenada daha fəal rol oynaması lazım olduğu vurğulanaraq, ölkənin Parisdə keçirilən sammitə qatılmadığı xatırladılıb.
Türkiyənin sammitdə iştirakına toxunulan bəyanatda Yunanıstanın iştirak etməməsinin "ölkənin strateji mövqeyini zəiflətdiyi" bildirilib.
Mövsüm
AzNews.az