“Rusiyanın son hücumları, Ər-Riyaddakı razılaşmalardan sonra qəsdən həyata keçirilir. Rusiya, Ukrayna ilə danışıqların növbəti mərhələsində mövqeyini gücləndirmək və öz şərtlərini irəli sürmək məqsədilə bu addımları atır. Bu cür hücumlar, dövlətlərarası etimad, sülh və barış mühitinin formalaşmasını gecikdirir”.
Bu fikirləri AzNews.az-a açıqlamasında siyasi şərhçi Tural İsmayılov deyib.
Xatırladaq ki, son günlər Rusiya Ukraynaya qarşı kütləvi PUA hücumları həyata keçirməyə başlayıb. Bu hücumlar nəticəsində Xarkov, Sumı, Odessa və Donetsk vilayətlərinə ciddi ziyan dəyib. Görünən odur ki, Rusiya Silahlı Qüvvələri yeni hücum taktikasını aktiv şəkildə tətbiq edərək Ukraynaya qarşı kütləvi zərbələrini davam etdirməkdə qərarlıdır.
Siyasi şərhçi qeyd edib ki, Rusiya Ukraynanı daha tez müqavilə imzalamağa məcbur etmək məqsədilə hücumların intensivliyini artırıb.
“Xüsusilə, Odessa, Xarkov və digər vilayətlər pilotsuz uçuş aparatları (PUA) vasitəsilə hədəfə alınır. Bununla belə, məsuliyyət yalnız Rusiyanın üzərində deyil. ABŞ da dolayısı ilə bu prosesə təsir göstərir. Vaşinqton, Rusiyanın Ukraynaya qarşı hücumlarına yetərincə sərt reaksiya vermir. Çünki Tramp administrasiyası da istəyir ki, Zelenski mümkün qədər tez ABŞ və Rusiyanın şərtlərini qəbul etsin. Bütün bunlar onu göstərir ki, yaxın zamanda Rusiya-Ukrayna müharibəsinə dair hər hansı çərçivə sazişinin və ya sülh müqaviləsinin imzalanması real görünmür”.
Rəfiqə NAMAZƏLİYEVA,
AzNews.az