Vaşinqtonun tarifləri Azərbaycanın ABŞ-yə ixracına ciddi təsir göstərməsə də, artım tempini zəiflədə bilər.
Bunu Milli Məclisin deputatı Vüqar Bayramov feysbuk sosial şəbəkəsindəki hesabında bildirib.
“ABŞ Prezidenti Donald Tramp dünya ölkələrinə qarşı yeni tariflər tətbiq olunmasını nəzərdə tutan fərman imzalayıb. Tariflərin təsir dairəsinə düşən ölkələr arasında Azərbaycan da var. Ölkəmiz üçün minimum 10 % həcmində gömrük rüsumu müəyyən edilib.
Son illərdə Azərbaycanla ABŞ arasında ticarət dövriyyəsinin artmasına baxmayaraq, əsasən ABŞ-dən idxal üstünlük təşkil edir. Belə ki, 2024-cü ildə Azərbaycana ABŞ-dən 1 milyard 617 milyon dollarlıq mal idxal olunub, ölkəmizin Birləşmiş Ştatlara ixracı isə cəmi 135 milyon 30 min dollar təşkil edib. Bu da 1 milyard 482 milyon dollarlıq mənfi ticarət saldosu deməkdir”, - deyə deputat bildirib.
V. Bayramovun sözlərinə görə, 2024-cü ildə ABŞ-dən Azərbaycana idxal əvvəlki illə müqayisədə 1,8 dəfə, ABŞ-a ixrac isə 8,4 dəfə artıb: “İxracımızın ümumi həcmi kiçik olsa da, artım tempi çox yüksəkdir. Bu, Azərbaycanın ABŞ bazarına çıxış imkanlarının genişləndiyini göstərir. Lakin yeni tariflər əsasən qeyri-neft-qaz ixrac məhsullarına təsir edəcək. 2024-cü ildə qeyri-neft-qaz məhsulları üzrə ABŞ-yə ixracımız 134 milyon 663 min dollar olub. Bunun 55 milyon 949 min dolları Azərbaycan mənşəli məhsullardır. Ümumilikdə, qeyri-neft-qaz sektoru üzrə ixracımız 3 milyard 356 milyon dollar, Azərbaycan mənşəli qeyri-neft-qaz məhsulları üzrə ixrac isə 2 milyard 883 milyon dollar təşkil edib. Bu kontekstdə ABŞ-la qeyri-neft-qaz sahəsində ticarət əlaqələrimizin payı hələ də aşağıdır”.
Deputat əlavə edib ki, 2024-cü ildə Azərbaycan ABŞ-yə müxtəlif məhsullar ixrac edib. Bunlara 6 milyon 508 min dollarlıq polimer materiallar, 593 min dollarlıq heyvan bağırsaqları, 410 min dollarlıq tropik və digər meyvə şirələri, 279 min dollarlıq nərə balığı kürüsü, 242 min dollarlıq saflaşdırılmamış zeytun yağı, 177 min dollarlıq meyvə mürəbbələri və pastaları daxildir.
“Göründüyü kimi, Azərbaycanın ABŞ-yə qeyri-neft-qaz ixracı böyük həcm təşkil etməsə də, müxtəlif məhsul qrupları üzrə şaxələnib. Buna görə də yeni tariflər ixracımıza ciddi təsir göstərməsə də, ümumi artım dinamikasına təsir edə bilər. Tariflər əlavə xərc deməkdir və nəticədə ABŞ-yə ixracın artım tempinin azalması ehtimalı var. Lakin nəzərə almaq lazımdır ki, ixrac etdiyimiz məhsullar spesifik xarakter daşıyır və bazardakı mövqelərinə 10 %-lik tarifin təsiri minimal ola bilər. Ümumilikdə, yeni tariflər qlobal iqtisadiyyatda yeni mərhələnin başlanğıcı kimi qiymətləndirilə bilər”, - deyə deputat vurğulayıb.