AMEA doktoranturaya sənəd qəbulu və imtahanların vaxtını açıqlayıb
20 Noyabr 2013 18:11 (UTC+04:00)
Azərbaycan Milli Elmlər Akademiyası doktoranturaya sənəd qəbulu və imtahanların vaxtını açıqlayıb.
APA-nın xəbərinə görə, bu barədə AMEA-nın akademik katibi, müxbir üzv Rasim Əliquliyev Rəyasət Heyətinin növbəti iclasında məlumat verib.
O bildirib ki, noyabr ayının 25-dək doktoranturaya qəbul haqqında elan dərc olunacaq, dekabr ayının 20-dək sənədlərin qəbulu aparılacaq. Dekabr ayının 25-dən isə qəbul imtahanları başlayacaq: "Akademiyada doktorantura yolu ilə fəlsəfə doktoru hazırlığı üzrə 205 yer ayrılmışdır. Onlardan 126-sı əyani, 79-u qiyabidir. Elmlər doktoru hazırlığı üzrə isə 72 qiyabi yer nəzərdə tutulur. Büdcə hesabına dissertantura yolu ilə fəlsəfə doktoru hazırlığı üzrə 231 və elmlər doktoru hazırlığı üzrə 115 yer müəyyən olunub".
AzNews.az