Müsavat paytaxt rəhbərliyinə müraciət edir
27 May 2014 10:03 (UTC+04:00)
Müsavat Partiyası qurultayla bağlı Bakı Şəhər İcra Hakimiyyətinə müraciət edəcək.
Bu barədə məlumatı AzNews.az-a Müsavat Partiyasının Mərkəzi İcra Aparatının rəhbəri Arif Hacılı verib.
Onun sözlərinə görə, müraciət Bakı Şəhər İcra Hakimiyyətinə bu gün təqdim olunacaq: "Dünən Müsavat Partiyanının qurultayla bağlı iclası keçirildi. Əsas təklif bu oldu ki, bizə qurultay keçirmək üçün 800-1000 nəfərlik zal lazımdır. Bu gün bununla bağlı Bakı Şəhər İcra Hakimiyyətinə müraciət ediləcək."
Qeyd edək ki, Müsavat Partiyasının Qurultayın keçirilməsi üzrə Təşkilat Komitəsi adıçəkilən tədbirin iyunun 28-də keçirilməsi ilə bağlı qərar qəbul edib.
Xatırladaq ki, 1911-ci ildə qurulmuş Müsavat Partiyası indiyəcən 7 qurultay keçirib. Sonuncu qurultay 2006-cı ildə olub. Bu qurultayda əsas məqam isə İsa Qəmbərin partiyanın başqanlığı uğrunda keçiriləcək seçkidə iştirak etməməsi ilə bağlı gözləntilərdir.
Bahar Rüstəmli
AzNews.az