Qızı qaçırılan kişini və onun oğlunu güllələdilər

6 Aprel 2015 12:13 (UTC+04:00)

AZNEWS.AZ xəbər verir ki, bu haqda məlumatı İHA agentliyi yayıb.

Hadisə Manisanın Turqutlu bölgəsində qeydə alınıb.

Dava nəticəsində 16 yaşlı Delil Sapan tüfənglə vurularaq öldürülüb, onun atası 50 yaşlı Həmdullah Sapan isə ağır yaralanıb.

İddiaya görə, üç gün əvvəl 19 yaşlı qızı M.S.nin C.A. tərəfindən qaçırıldığına görə Həmdullah Sapan oğlu Delil Sapanla gəncin evinə gedib. Evin qabağında danışmağa başlayan iki ailə arasında mübahisə çıxıb. Mübahisə böyüyərək silahlı davaya çevrilib. Naməlum şəxs Həmdullah Sapanla onun oğlu Delilə güllə atıb.

Təcili tibbi yardım maşını gələnədək Delil hadisə yerində ölüb. Ağır yaralı olan Həmdullah Sapan isə Turqutlu Dövlət Xəstəxanasına qaldırılıb. Onun vəziyyətinin kritik olduğu deyilir.

19 yaşlı qızı qaçıran və davadan sonra aradan çıxan C.A. və onun 2 qohumunun yaxalanması üçün polis axtarışa başlayıb.

Hadisə ilə bağlı istintaq aparılır.